ឳកាសថ្មីនៃក្តីសង្ឃឹម កុមារី ផាន់ ឃា

ដោយអ្នកស្ម័គ្រចិត្តយុវតារាក្នុងខេត្តកំពង់ធំ
លោក ជួង សុជា

សុជា បានជួបជាមួយនឹង កុមារី ផាន ឃា នៅខែសីហា ឆ្នាំ២០១៧។ ឃា កើតក្នុងឆ្នាំ ២០០៥ ហើយនាងកាលពីនាងមានអាយុ១០ឆ្នាំ។ ឃា រស់នៅ​ជា​មួយ គ្រួសារនិងប្អូន​ប្រុស​ម្នាក់ដែលឋិតក្នុង ភូមិជះ ឃុំ​ព្រះ​ដំរី ស្រុក​ស្ទោង ខេត្ត​កំពង់​ធំ។ នៅអាយុ១២ឆ្នាំ នាងបានចំណាកស្រុកទៅធ្វើការ​នៅប្រទេស​ថៃ​ដើម្បី​ជួយរកថវិកាមកផ្គត់​ផ្គង់​គ្រួសារ។ ថ្ងៃដំបូងដែលសូជាបានជួបនាង នាងបានរៀបរាប់ថា នាងចង់ចូលរៀនវិញ ក៏ប៉ុន្តែនាងព្រួយបារម្ភជាខ្លាចអានមិនបានល្អ ខ្លាចគ្រូ និងខ្មាសអៀនមិត្តភក្តិរបស់នាងណាស់។ សូជា បានចាប់ផ្តើដោយមានទំនុកចិត្តថានិងប្រឹងប្រែងចំណាយពេលពន្យល់ណែនាំនាងអំពីតម្លៃនៃការសិក្សានិងធ្វើឲ្យនាងមានទំនុកចិត្តក្នុងការចូលរៀនឡើងវិញ​។ សៀវភៅដំបូងដែលសូជាសរសេរដើម្បីឲ្យ ឃា អានមានចំណងជើងថា “ខ្ញុំអាន ខ្ញុំចេះ ខ្ញុំគិត ខ្ញុំមានបញ្ញា” ដែលសៀវភៅនោះនិយាយអំពីតម្លៃនៃការអាន ថែមទាំងការកសាងបុគ្គលិកលក្ខណៈល្អនិងឈ្លាសវៃ។ សូជាក៏បានពឹងប្អូនស្រី ផាន ផាន់ណា ជាសមាជិកក្លិបម្នាក់ដែលនៅផ្ទះក្បែររបស់ ឃា ឲ្យជួយនាងក្នុងការ​អានសៀវភៅនោះ។ មិនដល់ពីរសប្តាហ៍ផង នាងក៏អានវារហូតដល់ចប់ ហើយនាងក៏ចាប់ផ្តើមបង្ហាញពីឆន្ទៈក្នុងការចូលរៀនឡើងវិញ។ ដោយឃើញភាពរីកចំរើនរបស់នាង សូជាក៏បានឲ្យនាងអានសៀវភៅមួយក្បាលទៀត ដែលមានឈ្មោះថា “ក្ដីសុបិននៃដង្កូវ”។ នាងបានព្យាយាមអានរហូតរាល់ពេលទំនេរពីកិច្ចការផ្ទះ និងមើលប្អូនតូច។ ក្រៅពីការចូលចិត្តអានសៀវភៅ ឃាក៏បានចូលរួមក្នុងសកម្មភាពផ្សេងៗរបស់ក្លឹបយុវជន។ ដោយសារការយកចិត្តទុកដាក់ពីសំណាក់អ្នកស្ម័គ្រចិត្តយុវតារា រួមទាំងសមាជិកក្លឹបយុវជនក្នុងការជម្រុញនិងជ្រោមជ្រែងឲ្យឃា បានចូលរៀនវិញ។ ជាលទ្ធផល ឃាបានចូលរៀនវិញក្នុងថ្នាក់ទី ៦ ហើយនាងបានកែប្រែជាច្រើនបន្ទាប់ពីនាងបានចូលរៀនវិញ។ នាងបានបង្ហាញចាប់​អារម្មណ៍ថា ខ្លួនគេចូលចិត្តមុខវិជ្ជា​ភាសាខ្មែរ​ខ្លាំងជាង​គេ។​

នាង​ក្លាយ​ជាក្មេង​ដែលចិត្តលេងសប្បាយជាមិត្ត​ភក្តិ និងមានទំនាក់​ទំនង​ល្អទៀត​ផង។ ឪពុករបស់នាងពិតជាសប្បាយចិត្ត​ណាស់​ ដែល​ឃើញកូនរបស់​គាត់​មករៀន​បាន​ទៀង​ទាត់ និងខិតខំប្រឹងរៀនបែបនេះ។ ចំណែកឯគ្រូបន្ទុករបស់​ថ្នាក់របស់គេវិញគឺលោកគ្រូ ម៉ី សុម៉េង គាត់និយាយថា ឃាមានការសិក្សាល្អដូច​ក្មេងដទៃទៀតដែរ ថ្វីត្បិតនាងឈប់រៀនកាលពីថ្នាក់ទី៥ក៏ដោយ។ ឃា បានក្លាយជាក្មេង ដែលមានក្ដីសង្ឃឹមឡើងវិញ និងចេះដាក់គោលដៅសម្រាប់ខ្លួនឯង​ទៀត​ផង ដោយនាងបានតាំងចិត្តថា នឹង​ធ្វើជា​គ្រូបង្រៀនភាសាខ្មែរនៅថ្ងៃអនាគត។ នាងពិតជាគំរូរល្អសម្រាប់ក្មេងៗទៀតដែលបានបោះការសិក្សា​នៅក្នុងសហគមន៍របស់នាង​។

ក្នុងនាមជាអ្នកស្ម័គ្រចិត្តយុវតារា សូជាពិតជាមានក្តីរំភើបក្រែលែងដែលបានឃើញការផ្លាស់ប្តូដ៏ល្អប្រសើរបែបនេះ។